ناس كتير فاكرة إن الدول التانيه متقدمة كتير عننا، وأبسط دليل هو عدد الحاصلين على جائزة نوبل الشهيرة بالمقارنة بالدول العربية والمسلمة!
وأنا أحب أقولكم لأ بقى، بالعكس .. أبسلوتلي، إحنا اللي متقدمين ومتقدمين جامد كمان. بس إحنا كعرب مش عايزين ناخد نوبل أصلا وبمزاجنا
ليه ! أصل حضرتك يا متعلم لو شوفت تاريخ جائزة نوبل هتعرف كام واحد يهودي عامة أو إسرائيلي بالخصوص حصل على الجائزة دي! يعني تطبيع ... تطبييييييع
علشان كده إحنا قررنا منحصلش على نوبل. مش بس كده، ده أى حد بيتجرأ وبيحصل عليها مش بنعبره ولا نديله أى قيمة وبنحاربة علشان يكون عبرة لكل من تسول له نفسه!
ثم إن أصلا نوبل ده مش اللي عمل القنبلة النووية ؟؟ لا منرضاش بالوضع ده إحنا لينا قيمنا ومبادئنا.
وبالتالي إحنا فضلنا نتميز في مجالات كتير زى ال...
أنا أصلا مش مضطر أقول احنا بنعمل ايه، إضافاتي كعربي للبشرية هى اللي بتتكلم عني!
إنتو متعرفوش جدودنا عملوا أيه؟ مسمعتوش عن الحضارات العظيمة في أراضينا! ده كفاية يا أخي الأماكن السياحية، جائزة نوبل ايه دي اللي ندور عليها
لا يا باشا، مش إحنا
"منحت الجائزة منذ تأسيسها إلى ما يزيد على ثمان مائة شخص، على الأقل 20% منهم يهود، رغم أن عدد اليهود لا يزيد على 0.2% من سكان العالم."
أما العرب .. خلينا نختصر
4 نوبل للسلام "جائزة ملهاش لازمة"
1 نوبل في الأدب "نجيب محفوظ"
1 نوبل في الكمياء "أحمد زويل"
اما الطريف هو عدد 2 نوبل ممنوحة لصالح أميريكي وبريطاني بس إحنا مبسوطين إنهم من أصل عربي ... أهم يزودو عدد الحاصلين على الجائزة
بقلمي – للأسف- شادي الصاحي
3/11/2013
